Pieter geseyt van DORISEELE

Other Events:

• Beroep: dorser

Notes:

RAZVL 471

Op 16 april 1567 anscauwet ten huuse van Lauwerijns Zoetaert tdoode lichame van eenen dasscher [korendorser] ghenaempt Pieter die metten zelven Lauwerijns achte daeghen ghewoont hadde ende daer te vooren met Arnoudt Danneelssen, gheboren zomen
zeyde te Dorazelle inde prochie van Everghem wyens toename aldaer elcken onbekent es ende was een joncman luttel ofte gheen baert hebbende. Ende wiert bevonden ghequets in syn slyncker arme neffens aen zyn ocsele aldaer hy een wonde hadde
zonder meer ende zonder eenighe bulslaghe welcke wonde niet en penetreirde nochtans wiert die ghedeclareirt letale ende doodel: by mre Chrispiaen La Mote ghesworen chirurgien ende dat daer de groote esfluen? des bloets twelck men zeyde ghedaen
te zyne by eenen ghenaempt Pr Vermoor wonachtich te Houcke ten huuze vande weduwe van Jacob Lauwers sdaechs te vooren inden avendt alzo den defunct ende den voorn Pr met meer andere tsamen hadden ghedroncken int hoochuus binnen der zelven stede
ende aldaer jeghens elckanderen quastien ghecreghen hadde ende dat den diffunct vooren loopende naer thuus van Lauwereijns Zoetaert daer in woonde es hem den voorn Pr Vermoor ghevolcht ende alsdoen hem ghestoken de zelve wonde met een brootmes
ofte snydere zo dat hy daerof ghestorven es ten twaelf hueren in de zelve nacht. Actum den daghe ende jaere als boven present Adriaen de Brune als stedehoudere van Jacob de Muennick hoogbailliu, Jacob Gheertssen ende Inghel Arents, scepenen.

De ghelaghenoten waren Adriaen Deins, Jacob van Ghendt, Hansken Storm, twee cnapen van Fransois Luucx.

Men zoude oock mueghen hooren by informaty Adriaen de Vos weert int hooch huus ende Arnout Danneelssen.

 

RAZVL 471

Informatie ghehoort opde homicidie ghecommiteert inden persoon van Pieter ghezeyt van Doriseele ten verzoucke van Adriaen de Brune bailliu present tgheheel collegie vander stede vander Mude den xven van meye xv c lxvij

 

Hans Storm oudt 22 jaren jonckman wonachtich met Arnout Danneelssen binnen deser stede ghevraecht by solempnelen eede op de homicide voors: verclaersdt dat hy op den 15en van april 67 naer paesschen op eenen zondachavendt gheweest es in een
gheselscap int hooghe huus deser stede met eenen Willem cousijn vanden daffuncten, Clays Adams, den voorn Pieter van Doreseele, Pieter Vermoor ende twee knapen van Franchois Luucx deene ghenaempt Michiel ende dander Joos zonder te wetene haere
byname, ende Adriaen Denijs ende Michiel Zoetaert. Aldaer de voorn Pr deffunct niet wel te vreden zynde dat een knechtken wonachtich inde herberghe ghebrocht hadde een canne waghebaert voor een kanne maersbier dreeghende de kanne naer t
knechtkens hooft te werpene ende alzo hy deposant hem zeyde dat hy tzelve niet doen en zoude maer nemen zynen ghelycke wiert den deffunct toornich op hem deposant ende hadde diveerssche woorden thhn:? Nemaer daer wiert pays ghedroncken ende
inde handt ghesleghen. Daernaer es de deffunct niet zeer nuchtere wesende en hem noch niet te vreden houdende hebbende altyts onder de tafele ghenouch in meeninghe die opden deposant te werpene hoe wel dat hy anderwart ghenouch hem de handt
boot om paeijs te maecken zo dat den deffunct hendelinghe twee snyders nemende in de hant hem deposant dede deysen? midts dat hy niet scerps en hadde over hem tot uuter camere ende tot voor thuus van Lauwereyns Zoetaert tsteken? voor de bailliu
diveersche steken te andre...? De diveersche persoonen die dat zachgen? ende thende ghenouch ghestoken hebbende nam hem deposant weder byde handt ende leede hem tot in de voorn herbergh aldaer hy deposant commende zo heeft Jacob van Harpe ende
Jacob van Ghendt ontroert wesende hem deposant ontcleet om te ziene of hy deposant niet ghequetst en was doen nam hem den deffunct noch de candelare inde handt willende zyn thooren vreken op diet aen hem trecken zoude zo dat alle de
ghelaghenoten ghezaemdel: hem uuten huuse deden ruymen hem volghende zonder dat hy weet hoe verre ende alle wedercommende zynde quam den deffunct wederomme met een stock forcelicke stekende opde duere naer twelcken zynde zommighe ghelaghenoten
ghelopen duer dachterduere uuten huuse. Nemaer en weet hy deposant niet wye nochte hoe vele midts dat hy aldaer inde kueken vanden huuse bleef.

 

Ten zelven daghe present Jo:Heindricx ende Jacob Heindr scepenen

 

Clays Adams oudt xxxj jaeren ofte daerontrent breyker [iem die ingewanden uit vis haalt] ter Sluus verclaerst by solempnelen eede dat zondaghe leedt drie weken hy deposant was int hooghehuus met de voorn ghelaghenoten aldaer zeker questie
gheresen was tusschen een Hans Storm ghelaghenoot ende den voorn Pr nu overleden ter cause van een kanne wagebaerts die ghebrocht was voor marsbier ende omme dat Pr Barselier daerinne zeer toornich viel? zeijde Hans Storm dat hy liever de kanne
betalen zoude dan daer questie omme quame commen zoude ende alzo zy diveersche woorden tsamen hadden ende dat den voor Pr gheenssints te paysieren was wierp Hans Storm een tailloor ende een platteel naer thooft vande voor Pr hem gherakende aen
zyn eene hareme [arm] ende Hans voorn begheerende dicmael pays te maecken met Pr nemaer Pr en wilde daertoe niet verstaen dat hendel: beede uut de camere ghelopen zyn zonder dat yemants anders vande ghelaghenoten de questie aen tract? met meer
Pr Vermoor dan dandere ende alzo zy buuten huuse hadden gheweist woestelende langhen tyt tusschen licht ende donckere zyn beede tsamen wederome ghecommen al keyvende ende wandt Hans voornoomt bebloet was aen zynen hals zo visiteirde hy deposant
den voorn Wm ende dander den voorn Hans hem ontcleenden ende beziende of hy niet ghequetst en was zo zy niet en bevonden ende binnen middelen tyden den zelve Pr altyts toornich wesende ende zonderlinghe omme dat zy maer den voorn Hans zaghen
heift hy den voorn Wm met vuisten gheslaghen int haenschyn zonder dat hy hem yet misdede ende den voorn Willem stack hem doe ter dueren uuyt ende alzo liep Pr ten huusen uute ende zyl: sloten de duere zonder datter yemant anders questie jeghens
hem hadde ende corts daernaer es den zelven Pr wederghekeert met een pyckstock ende snydere zo hy doen hoorde zegghen ende quam upde duere steken welcke welcke hy deposant hoorde.

 

 

Mids welcken Adriaen de Vos weert heml: ghelaghenoten zeyde jeghens hemlieden die inde vloer stonden daeronder Pr Vermoor een was hy deposant ende Hansken loopt daer achter ende ghy zult hem ghemoeten mids welcken liep Pr Vermoor deerste met
een ghetrocken snidere van achter uute den huuse daernaer Wm met een dychaex ende hy deposant hebbende een pyckstock in zyn handt die hem ghegheven was byden weert ende hy deposant volghende dandere twee heeft ghezien den voorn Pr t uusewaerts
loopen nemaer en zagh niet midts de duusterheyt of hy ghequetst was ofte niedt ende zy volchden hem alle drie nemaer daerna en heeft niemant van heml: drieen ... hem gheslaeghen nochte gesteken midts dat hy te verre vooren was ende als zy hem
ghejaecht hadden tot op thof van Lauwereijns Zoetaert vyndende de poort vanden hove toe zyn weder thuusewaert ghekeert ende alzo zy weder quaemen vraegde hy deposant of Pr Vermoor den voorn Pr nu overleden ghequetst hadde daerop dat hy zeyde ja
ick hy hevets ghenouch ende zyn alzo terstondt thuusewaerts ghegaen alle gader ende ende sanderdachs verstaende dat de voorn Pr overleden was zyn terstondt ghelopen naer Houcke adverterende daerof den voorn Pr Vermoor de welcke present twee
scepenen heml ontlesten ende hem tstick annetrack

Jacob Vlieghere oudt xxix jaeren ofte daerontrent verclaerst by solempnelen eede dat hy gheweest heeft in een ghelach int hooghe huus der stede met de voorn ghelaghenoten over drie weken van zondaghe leet aldaer gheroert es questie tusschen
Hansken Storme ende Pr die nu overleden es niet wetende de oorspronc vander questie midts dat hy int eerste van de ghelaghe by heml: niet en ware anders dan hy en voorn Pr altyts sach met zyn handen onder de tafele daerop dat Hans Storm altyts
quaet bemoede verzochte menichmael pays ende Pr zeyde altyts t es pays zo langh als ic wil zodat hendel: de zelve Hans wierp den zelven Pr met een tailliore naar tlyf ende synde een tinne platteel zonder dat hy hem gherochte naer twelcke den
voorn: Pr nam twee bloote snyders vervolghende alzo Hans Storm die vooren uute huuse liep ende hy daernaer ende wat tyts wech wezende zyn weder ghecommen ontrent de neghenen inden avent hebbende elkanderen byden handt ende wederomme alzo
commende zitten an tafele ende zy ghelaghenoten visiteirden den voornoomden Hans of hy niet ghequestst en was zo hy niet en was ander dan de steke was duer rock wambays ende hemde maer niet ghequetst ende alzo zy hem ontcleeden zo begonste den
voorn Pr anderwerf de beroerte ende nemende een mottale candelare omme Hans daermede te smyten ofte werpen wiert hem dat belet by de voorn Wm ende alzo scoot den voorn Pr terstondt met twee nact snyders uuten huuse halende een pyckstock ende
commende wederome ende vyndende de herberghe toe heeft drie ofte viermael ghesteken op de duere twelck Pieter Vermoor met een bloote snydere, Clays Adams ende Willem Canticie? met een dychaeck hoorende zyn van achter uut den huuse ghelopen
nemaer watter buuten ghesciede en weet hy deposant niet midts dat hy biden huuse bleef anders dan corts daernaer de voorn drie persoonen wedercommende Pr Vermoor zeyde dat hy de man te weten Pr ghequetst hadde maer dat hy niet en wiste of hy
zeere ghequetst was ofte niet ofte waer dat hy hem de steken ghegheven hadde.